Vawlei cung ralpi pa3 nak tih a nung ko

Minung nih vawlei cung ralpi pathumnak cu nuclear hriamnaam, biological hriamnaam le chemical hriamnaam in an i do te lai tiah zumhnak an ngei. Asinain nuclear ngeimi ram pawl hi anmah le anmah an i ttih caah an hrimanaam hi a hmang ngam ding an si hna lo. An i chiah sawhsawh. Mi ttihpheihnak ca lawngah an rak hman. Nuclear ngeimi ram hna hi anmah le anmah an i tu duh lo.

USA nih Japan i nuclear a rak hman ngammi zong kha vawlei cungah amah lawng nih a rak ngeih caah a rak hman ngam. Korean war ahkhan Russia le China nih North Korea an dirpi. USA le a hawi le nih South Korea an dirpi Korea chung lawngah an i tu hna i kha nuclear ngeimi ram kha anmah le anmah an i tu duh bal lo. Atu Syria zong khi asi ve. USA nih tapung abomh i Asad ralkap le ISIS a tuk hna. Russia nih Asad ralkap cu a bawmh ve hna. Asinain USA le Russia kha an i tu duh bak lo. Atu ah vawlei pumpi ah a thomi ral cu minung le virus karlak i idohnak asi. 1. Vawlei cung ralpi cu vawlei cung minung nih ral kan doh dihmi khi vawlei cung ralpi ti asi. Atu COVID-19 cu vawlei cung pumpi nih kan doh caah vawlei cung ralpi ah chiah khawh asi ve.

COVID-19 zong nih a kan doh ve i minung 14,652 a kan thah cang. Zawtnak a ngeih termi hi March 24 tiangah 334,981 an si. Minung zong nihcun virus cu kan doh ve i tam taktak an tah ve cang. 2. Vawlei cung ralpi i tuk ahcun ral an i tei hlan lo an i din kho lo, ral an dih tiang an i tu peng. Atu i vawlei cung ralpi COVID-19 zong cu ral a dih cikcek tiang bak kha i doh a hau. Minung nih maw kan tei lai virus nih dah a kan tei lai. Minung nih maw a ci kan hmih lai, virus nih dah minung hi kan ci a kan hmih lai. Theih lo veve bak kan si. 3. Vawlei cung ralpi a thawh ahcun biakin an khar dih, pumhnak hmun a um kho bal lo. Atu COVID-19 ral zongah biakin hi khar dih ngawt asi cang. Biakin lawng si loin biaknak dang ipumhnak vialte zong khar dih a si ve.

4. Vawlei cung ralpi a thawh ahcun minung hi lam ah an i chawk ngam lo. Inchung ah an i erh dih. Ramlak hna ah a zam tawn. Atu zong cu vawlei cung ralpi cu doh asi caah inchung ah i erh dih asi ve. Acheu cu ramlak ah anmah lawng um ai timmi zong an um len ve cang. 5. Vawlei cung ralpi lio ahcun ral an doh ruang ah chaw an let kho ti lo, rian an ttuan kho ti lo. An ngeih ciami te lawng kha ei le din a rak si. Atu kan dohmi COVID-19 ral zonghi a tthawn tuk caah hmun tampi ahcun zaapi nih chaw an let kho ti lo, rian an ttuan kho ve ti lo. An ngeih ciami te kha ei le din asi ve cang. 6. Vawlei cung ralpi pakhatnak le pahnihnak hna kha cu minung le minung an rak i do. Zaangfahnak a ngei khomi minung le minung i doh asi. Asianian atu i kan dohmi ral cu zaangfahnak a ngei bak lomi, minung thinlung a keng lomi ral hi doh asi cang.

7. Vawlei cung ralpi pakhatnak le pahnihnak cu hrimnaam in rak i doh asi. Asianin atu COVID-19 ral cu siai, fimnak, nawlngaihnak in dohmi ral asi. Hraimnaam i raldoh lawng hi ral doh asi lo. Minung a kan thahtu ral kha amah le asi ning in kan dohmi ral poh kha ral doh asi ko. Sehtan zong meital in kan kap lo nain, thlacamnak in kan doh ko nain ral kan doh a si ve ko. COVID-19 ral kan dohmi zong hi ral doh asi ve ko. 8. Ralpi pakhatnak le pahnihnak cu mangttam nih a zulh. Nihin ah Donald Trump nih minung hi virus nakin mangttam nih a kan thah deuh te men lai tiah a chim cang. Cu mangttam cu kan hrial khawh nakhnga US inka ka khar lai lo tiah a ti.

9. Vawlei cung ralpi pakhatnak le pahnihnak nih tthatnak a chuahpi ve. Ralpi pahnihnak thawngin minung nih raltuk ttih a nun ning a theih. raltuk huatnak ah an hman deuh. Cun, ralpi pahnihnak ruangah colony uknak tang ah a rak ummi ram hna nih colony kut chung in luatnak an hmuh dih. COVID-19 ral ruangah minung nih Pathian kan i bochan deuh ve cang lai. Nu le nu, pa le pa i umnak zong hi Pthian an theih hna ahcun a tlau te lai. 10. Sadrakh, Mesakh le Abednegohna cu Pathian nih a umpi hna. A umpi ko hna nain meiphu chungah tla lo ding in a khamh hna lo. Meiphu ah tlak nak nawl a peek hna. Asinain Pathian nih mephung chungah a luhpi hna i a umpi hna. Zumtu hna hi virus chungah Pathian nih a luh ter khawh men ko., Asinain nangmah lawng na lut lai lo Pathian nih an um pi lai. Pathian nih an luh pi lai. Na thih sual zongah Pathian nih mawh an phurh dih lai. Cucu zumtu le zumlotu kan i dannak te cu asi. Vawlei cung ralpi kan doh hna caah nan thazaang dihlak chuah hna ulaw lungkhat in do tti hna usih! Nusal, pasal ti hna usih.