Tu lio coronavirus hi mipi le Pathian i tonnak a si

Tulio kan vawleipi boruak cu harsatnak, zawhfahnak, ttahaihramnak in a khat. COVID-19 hi ram 199 nih kan tuar cang. Atu tiang kan dirhmun ah minung 27,674 an phan. Ruah lo awk thalo cu, vawlei kan chuahchan hi tem-innak maw a si ne hnga ti a fawite. Hilio caan ah cun Buddhist zumhnak hi hlah maw vawlei ah minung kan si-canning taktak a si ko ti ruah a fawi. Zeicahtiah, annih nih cun, “ Nunnak hi harnak in a khat ti cu palh awk thalo a si. Duhtlinlonak, diriamhlonak hi vawlei ah a khah in a khat; cucu kan lung nih a duhmi kha tlin khawh ti ngaingai a um lo caah le, duhmi he hmanh thencheunak a chuahnak ram a si caah a si. Cu a si caah ngaihchiat mitthli tlaknak le zun tuarnak nih kan vawleipi hi a hngah in hngah.

Nuamhnak ni kan cung ah a tlang kan ti ko bu hmanh ah caan sau a rau lo, mitthli nih a hun dawi colh. Kan nunnak ah tumruhmi a tam lengluang bantukin duhmi a tam. Nun nuamhnak, ngeihchiah tbk hna kha kan duh bantukin kan kawlhawl hna. Sinain adonghnak ahcun lunglawmhnak mitthli kha ngaihchiatnak mitthli ah a cang than ko. Hi kan tonmi hna hi cu duhhlei cuainak, hakkauhnak in a rami an si hna cucaah hi chungin kan luat khawhnak bik ding cu tlaihchan tukin duhnak kan ngeihmi kha hloh lawnglawng in kan luat kho lai. Cu kan tei khawh lo paoh ahcun harnak chungin kan luat bal lai lo” tiah an ti.

Annih (Buddhist) nih cun hakkauhnak tei khawh lawngah vawlei nun harnak in kan luat lai an ti. Sinain kannih Khrihfa nih cun harnak kan tonmi hna hi Pathian mithmai ceu dawh hmuhnak an si, amah he kan i pehltaihnak lam karhlan pitu a si kan ti. Zeicahtiah, Khrih Jesuh hrimhrim nih kan tuar hrimhrim lai kong kha a kan chimh ko, sinain cu harnak nih a kan tei lan lai lo zong kha biaro a kan vuihtak, zeicahtiah amah nih a kan teipiak cang.

Cu a hngalthiammi Sarah Flower Adams nih cun, “harnak, ngaihchiatnak, zawtfahnak ka ton caan zong ah ka hla sung cu “Ka Pathian pawngah” ti a si zungzal ko. Zeicahtiah, kei ka caah cun nifa ka nun i Bawipa vailamtah tung put kha Pathian ka naihnak a si i harnak le thihnak thladem zong nihkhan Pathian lei ah an ka hruai. Vanmi hna rung ttum in mitthli he har caan ah an rak ka hnemh tikah Pathian lei ah an ka hruai. Donh cawklo a luangmi ka mitthli le ka ngaihchiatnak zong nih Pathian a ka naihter chin. Cucaah Pathian khuakhan ningin ka tonmi hna nih “Ka Pathian pawngah” ti hla dawh an ka pek a ti.

Sarah hi 1834 hrawng, London khuapi ah mipi nih uar ngaimi lemcang minthang a si. An sining le an dirhmun ruah ah sifah harsatnak chungah a lut kho lo ding, mi vanhai in a um kho lo ding hmuh in rak hmuh an si. Sinain thinphin zawtnak nih a chuahpi a nau, Eliza Flower a den tikah nun vansangau in an rak um. Vawlei sii lei thiamsang tampi an panh hna, an ngeihchiah tampi an dih, nain an damh kho hlei lo i a nunnak a liam. Cun cu hnu tlawmpal ah amah Sarah hrimhrim zong taksa damlo ruangah a nunnak a liam ve. A thih hlan ah Pathian thangtthatnak hla tampi a phuah, cu chungah Gen.28:11-19 chungah, “nun himnak ruah ah therphang lengmang in a zammi Jacob, Pathian he zanmang i bia an ruahnak, biakamnak tiang a pek i “Ka Pathian na si lai” a timi nih a nun a khuaih tuk tikah “Ka Pathian pawngah” timi hla a phuahnak hi a si.

Cucaah kannih zong, kan nunnak ah harnak tampi kan tong ko lai, sunghzatlaknak tampi kan tong ko lai, zawtfahnak nih kan nun a den caan tampi ko lai, chungkhar khuasaknak kong ah lungrethei in kan um caan a tampi ko lai; sinain cu vialte cu Pathian lei ah kar an hlanpitu, a mithmai ceu dawh an hmuhtertu ah na hman thiam ahcun, na ti a hal hmanh ah na dar a cang lai lo. Chunglei hnangamnak in na khat lai i na hla sung cu “Ka Pathian pawngah” a si ve ko lai.Caron Tin Twin Oo