Thawngpang tha taktak:Minung tampi nih thil man fak piin an zuar lio ah man awl tein zuar a tuah

Hakha khuapi chung ah Gloria eidin le facang Dawr a ngeitu Pu Lian Uk Thang a thinlung put hi duh a nungtuk hringhran i upat tlak taktak zong a si. Midang nih facang man an kai ter cuahmah lio ah Pu Lian Uk Thang nih cun Covid 19 ruang ah harnak kan ton lio a si, cu caah facang man kai ter awk a ttha lo a ti pin ah a facang man zong a tthumh tiah theih asi.

Dawr dang ahcun Facang man an kai cuahmah, thong 37 in an rak zuar tawn mi zong kha nizaan boruak bak in an kai ter colh i thong 58 tiang a kai mi an um len ti a si. A si nain Lian Uk Thang tu nih cun nidang ah facang bag khat thong 30 in a zuar tawn mi kha a tu ahcun 29000 in a pek hna, thongkhat a tthumh hna.  Midang tampi nih cun facang a thar a phan ti lo kho tiah tulio thawngpang chia lakah facang man tiang in an kai ter colh len hi asi.

A si nain Pu Lian Uk Thang tu nih cun kai ter chim loin a niam deuh lehlam in a zuar, facang thar cu hmaithla lei ah a rak phan tthan ko lai, cu caah harsatnak ton cang ka in facang man kai ter cu tiah a tthumh leh lam hi a si. Zumtu nun taktak timi cu mah hi a si i harnak ton lio ah caan ttha lak loin, zawnruah nak thinlung taktak a ngeihnak zong a lang ngai ngai. Pathian nih a dawr thluachuah pe sehlaw kan Miphun caah bawmtu ttha sihram seh.