Apoituk hringhran paletwa peng khuate 9 cu thimnak an tuah kho lai lo

Chin Ramkulh chung milu tam cemnak hmun a si mi Paletwa Peng chung ah a ra lai ding thimnak ah Khuatekomh 9 hna cu ram a daih lo ca ah i tel khawh dawh an si lo tiah Minister Pu Soe Htet sin in kan theih. Sipin Minister Pu Soe Htet nih, “Ral an umnak hmun khua hrawnghrang hi cu an i tel kho lai lo. Cun, kanmah hrimhrim zong mee sawmnak ca ah kan kal kho lo, kan tlawng kho ve lo. Atu tiang ahcun Paletwa Peng chung ahhin Khuatekomh khua 9 hrawng hi thimnak ah i tel khawh dawh an si lo,” a chim.

Paletwa Peng chung ah pehtlaihnak lamsuul lei tlamtlin  lonak le ram a daih lo ca ah thimnak tuah ding zong hi a har ngaingai tiah Minister Pu Soe Htet nih a chimchap. Tutan thimnak ah Paletwa Peng chung in Pyithu Hluttaw Palai minung 4, Amyotha Hluttaw Palai minung 12, Ramkulh Hluttaw Palai minung 8 dihlak fonh Hluttaw Palai dihlak minung 24 an i zuam lai tiah Chin Ramkulh, Thimnak Zung nih an langhter.

Paletwa Peng, Khuatekomh 9 chung thimnak ah an i tel kho lai lo timi kong he pehtlai in Chin Ramkulh, Thimnak Zung Secretary Pu Lyin Kyaw nih, “Nihin tiang Paletwa Peng chung ah kahdohnak a chuak pah lengmang. Atu ah Khuatekomh khua 9 hi thimnak ah aa tel kho ding dirhmun an si lo. Aruang cu hi khua hna ahhin ral i tuk le an luhchuak ca ah tih a nung ngai. Asinain, Thimnak Zung lei nih tuah le tuah lo ding zeihmanh bia a khiak rih lo. Bianabia ah hi Khuatekomh khua 9 hna hi thimnak ah i tel kho loin um hmanh hna sehlaw a dang Khuatekomh i Hluttaw Palai hna nih an aiawh hna hnga. Buainak cu a um tuk theng lai lo,”  a chim.

Paletwa khuapi chung le Sami khuapi chung ah a ummi ralzaam hna zong pung-san 3 in an sok i, thimnak ah i tel kho ding in rian ngeitu hna nih an tawlrelpiak cuahmah. Peletwa Peng chung ahhin Khuatekomh 102 an um i, hi chung ah Khuatekomh khua 9 hi thimnak ah i tel kho ding dirhmun an si lo tiah kan theih. Credit : The Hakha Post