A poi kho taktak:Tang10 camen puai a tuah mi hna caah thawngpang chiah taktak

Myanmar ram chung ah COVID-19 zawtnak hrik a ngei mi minung pathum an hmuh hna ca ah March 11 in an phit mi taang 10 camipuai check lo ding in Ramkomh Fimcawnnak Zung nih cathanh a chuah i, Chinram chung in ca check ah kal ding in thim mi saya/ma hna zong an i let, tiah Chin Ramkulh Fimcawnnak Zung in kan theih.

Hi kong he pehtlai in Chin Ramkulh Fimcawnnak Zung Deputy Director Pu Khaw Kei Ki nih, “Ramkomh Fimcawnnak Zung in ca check nak tuah lo ding in ca an rak kan kuat. Myanmar ram chung ah kum dang ahcun taang 10 camipuai phit mi ca check nak hi April thla ah tuah a si tawn. Atu kum zong April thla ah tuah ding a si ko nain COVID-19 ruang ah an let than i, kanmah lei zong in kal kan i tim lo,” tiah The Hakha Post ah a chim.

Taang 10 camipuai ca check nak hi Monywa ah tuah ding a si i, Chin Ramkulh chung in saya/mah minung 358, (sayama 144 le saya 214) kal ding an si. A liamcia kum lio zong ah ca check ding in saya/mah minung 412 an rak kal tiah kan theih.

Cun, Chin saya/mah an kal mi kong he pehtlai in, “Tukum hi kal ding in min kan pek mi saya/mah minung 358 an si. Mahle peng cio in min lak an si i, Hakha peng in saya/mah 27, Thantlang peng in 24 kal ding an si. Asinain atu bantuk in Ramkomh Fimcawnnak zung nih cathanh a chuah ca ah an kal than  lai lo,” tiah a chimchap.